Ginbaton sang Miagao paagi kay Mayor Julieta N. Flores ang panghangkat bilang host sang First Congressional District Sports Association Meet 2010 sa Nobyembre 3 tubtub 6, 2010.
Sa opisyal nga turning over ceremony nga ginhiwat sa Justice Ramon B. Britanico Hall (JRBBH) sadtong Hulyo 28, 2010, ginbaton ni Mayor Flores gikan sa Banwa sang Oton ang bandera sang FCDSA. Ini bilang tanda sang pagbaton sini sang mga obligasyon kag responsibilidad bilang host sang nasambit nga event.
Sa amo man nga adlaw, nagpatigayon sang 1st Board of Director’s Meeting, nga kun sa diin kabahin sa gin-estoryahan amo ang: report sang treasurer sang tuig 2009, kantidad nga dapat ibulig sang mga kabanwahanan sang 1st District, mga hilikuton kag kinahanglanon sa hampang kag iban pa.
Ang event maga-umpisa sa Nobyembre 3 paagi sa isa ka parade palibot sa poblasyon sang Banwa. Ini pagasundan sang opening program sa Miagao Central Elementary School (MCES) Grounds sa alas 2:30 sa hapon, Pep Squad Competition, Board of Director Fellowship kag Search for Mr. and Ms. FCDSA sa Justice Ramon B. Britanico Hall. Sa Nobyembre 4 pagahiwaton ang Cultural Contest sa elementary kag Dance Sports Competition sa alas sais (6:00PM) sa JRBBH. Ang Cultural Contest sang secondary ang pagahiwaton sa Nobyembre 5. Samtang, ang closing program pagahiwaton sa MCES Grounds sa Nobyembre 6, alas dos sa hapon.
Kabahin sa mga hampang (sports competition) amo ang: softball, table tennis, taekwondo, volleyball, boxing, arnis, gymnastics, athletics, badminton, baseball, basketball, chess, football, swimming, sipa kag sepak takraw. Ang FCDSA ginabug-usan sang banwa sang Oton, Miagao, San Joaquin, Guimbal, Igbaras, Tubungan, kag Tigbauan.
Ang magadaug sa hinampang kag cultural contests amo ang mangin tiglawas sang 1st District sa Integrated Meet.#