Nabalik sa Miagao ang korona sini bilang Excellence in Local Governance Awardee Provincial Level para sa tuig 2009 pagkatapos nga ini ang madeklarar bilang Best Performing Local Government Unit Municipal Category A nga ginpatigayon sang Department of Interior and Local Government (DILG).
Bangud sang sini nga kadalag-an, ang Miagao ang isa sa mga banwa sa Probinsya sang Iloilo nga magacompete sa regional level.  Mangin kasumpong sini ang mga best performing LGU sang probinsya sang Aklan, Antique, Capiz kag Negros Occidental.  Ang evaluation pagapatigayunon sa indi mahibaluan nga adlaw sang Oktubre sang sini nga tuig.
Magluwas sini, nakuha man sang Miagao ang titulo bilang Excellence in Social Services, kag Excellence in Administrative Governance.
Nag-umpisa sadtong tuig 2008, ang EXCELL Awards isa ka tuigan nga kumpetisyon sang mga Local Government Units nga ginapatigayon sang DILG.  Ini nagahandum nga mapasidunggan kag mapakita ang mga pinasahi kag outstanding nga mga hinimuan sang local government as administrative governance, social services, economic development kag environmental management humalin sadtong Enero 2009 tubtub Disyembre sang perho nga tuig.
Ang Provincial Evaluation Team ginbug-usan sang mga evaluators gikan sa mga nagkalain-lain nga ahensya sang gobyerno pareho sang Provincial DILG, Provincial Environment and Natural Resources Office, PSWDO, Department of Education, Provincial Health Office, PNP Provincial Office kag iban pa.  
Si Mayor Julieta N. Flores sa iya mensahe nagsiling nga gina-abi-abi guid niya ang mga initiatibo nga pareho sini agud matakus ang ikasarang sang Miagao sa patag sang panghimanwa.  Suno sa iya, ang recognition apisar sa provincial level pa guid lamang isa ka patimaan nga ang Miagao ara sa eksakto nga dalan kun panggobyerno ang pagahambalan.
“Ang evaluation isa ka hangkat sa mga opisyales kag empleyado nga magdeliver pa guid sang excellent nga serbisyo sa mga pumuluyo sang Miagao,” ang siling ni Mayor Flores. #