Ang likawan ang makahalalit nga droga amo ang mayor nga mensahe nga ginapalab-ot sang miembro sang Speakers Bureau sang Municipal Anti-Drug Abuse Council sa ila pulong-pulong sa mga kabataan sa nagkalain-lain nga mga sekondarya nga eskwelahan sa Banwa.
Suno kay Mrs. Aida F. Dideles, Municipal Local Government Operations Officer sang Miagao, apisar sang padayon kag intensibo nga kampanya sang gobyerno batuk sa droga, ang ini nga problema nagapadaun sa sagihapon. Base sa datus sang PNP, ang Miagao, apisar sang mga ginamonitor nga personalidad, nagapabilin nga “not alarming” ang sitwasyon sa illegal nga droga.
Apisar sang katawhay sang Banwa, gintinguhaan guid sa gihapon sang MADAC nga magpatigayon sang ini nga hilikuton sa pagpati nga prevention kag public awareness ang ilabing importante agud mapalikaw naton sa droga ang mga kabataan nga sa masami nagatilaw sang droga agud masabat ang ila curiosity dire
ang siling ni Mrs. Dideles.
Magluwas sa RA 9165 ukon Comprehensive Dangerous Drugs Act of 2005, ang grupo nagahambal man sa mga topiko pareho sang: Juvenile Justice and Welfare Act of 2005 (RA 9344); Anti-Hazing Act (RA 8049); Special Protection of Children Against Child Abuse, Exploitation and Discrimination (RA 7610); Child and Youth Welfare Code (Municipal Ordinance 2009-05); kag Crime Prevention.
Ang grupo ginabug-usan nanday Mrs. Dideles kag Mrs. Mary Joy Selorio sang DILG, Mrs. Gilga Noveros sang Municipal Social Welfare Office, Mrs. Rosemarie Espina kag Lucia Nualla sang Municipal Health Office, Mrs. Adora Mande sang Office of the Mayor, kag P/Insp Fernand Limbungan, SPO1 Norberto Nabuab kag PO3 May Fajarito sang PNP.
Kabahin sang mga eskwelahan nga nakadtuan na sang grupo amo ang Kirayan National High School, Miagao National High School, Palaca-Damilisan National High School, San Rafael National High School, Alejandro Firmeza Memorial National High School, kag St. Louise de Marillac School of Miagao. Masunod nga kadtuan amo ang San Jose National High School, Bacolod National High School kag Supt. Arsenio Napud Memorial High School.
Pagakadtuan man sang grupo sa mga masunod nga baranagay; (1st Week) Valencia, Caitib, Pungtod Naulid, Bugtong Naulid, Ubos Ilawod, Ubos Ilaya, Mat-y, Lanutan, Indag-an kag Tan-agan; (2nd Week) Maninila, Tatoy, Naulid, Calampitao, Tacas, Baybay Sur, Baybay Norte, MAringyan, CUbay kag Aguiauan; (3rd Week) Kirayan Norte, Kirayan Sur, Banuyao, Bolho, Mambatad, Bacauan, San Rafael kag Banbanan; (4th Week) Kirayan Tacas, Igtuba, Guibongan, Palaca, Tabunacan, Damilisan, Potrido, Fundacion, San Fernando kag Igbugo.